Plantun de Prouvènço

Pèr coumpara dos planto d'encò nostre

Atriplex patula & Euonymus europaeus

Atriplex patula

Amaranthaceae Chenopodiaceae

Nom en français : Arroche étalée.

Descripcioun :
Aquest armòu di proun coumun, se desplego au sòu dins lis ermas e lis escoumbre. Pòu peréu èstre dre. Se recounèis à si fueio d'en bas que soun astado d'un biais qu'èi pas poussible de s'engana. Li valvo dóu fru (2-7 mm) soun tambèn astado e souvènt gibouso.

Usanço :
Se manjon li fueio en ensalado e peréu cuecho coume d'espinarc. Pamens faudra pas èstre trop couchous pèr lis acampa. Es uno bono ensalado pèr ana caga.

Port : Erbo
Taio : Pancaro entresigna
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Atriplex
Famiho : Amaranthaceae
Famiho classico : Chenopodiaceae

Coulour de la flour : Verdo
Petalo : ges
Ø (o loungour) flour : Pancaro entresigna
Flourido : Estiéu - Autouno

Sòu : Ca
Autour basso e auto : Pancaro entresigna
Aparado : Noun
Remarco : Ensalado champanello

Liò : Escoumbre e proche dis oustau - Champ - Ribiero
Estànci : Termoumediterran à Coulinen
Couroulougi : Pancaro entresigna
Ref. sc. : Atriplex patula L., 1753

Bounet-de-capelan

Euonymus europaeus

Celastraceae

Àutri noum : Fusan, Coulougnet, Grano-pesoulino.

Noms en français : Fusain, Fusain d'Europe.

Descripcioun :
Lou bounet-de-capelan es un aubret que trachis dins li relarg fres e proche d'aigo. Fai de fueio longo de 2 à 10 cm e de pichòti flour en crous de 6 à 10 mm. Mai se recounèis subretout emé si fru que sèmblon li bounet que pourtien, à passa tèms, li capelan. Aquéli soun roso e quàsi redoun sus lou dessubre e caupon 4 grano. Coumpara emé lou bounet-de-capelan-di-làrgi-fueio qu'èi pentamèro.

Usanço :
Couneissèn pas d'usanço particuliero en Prouvènço pèr aquelo planto. Pamens se saup qu'es emé soun bos cabounisa que se fai lou fusan pèr lou dessin. Dins d'ùni relarg se servien di fru pèr tencha en rouge.